اغلاق

انا من عرب 48 تزوجت مصري وبحاجة لنصيحتكم

بسم الله الرحمن الرحيم تحية طيبة وبعد: أنا أمرأة من عرب ال 48،،متزوجه من شخص مصري.وعايشه بمصر،هو مصري بحمل الجنسيه الأمريكية،

 أنا صراحة تعرفت عليه عن طريق الأردن كنت كثير أسافر هناك وأشارك ببعث ،ومؤتمرات كنا نعملها من كل البلدان العربيه من أجل السلام وهي لها علاقه بموضوع العلاقات الخارجيه بين الدول،يعني الها علاقه بعلم الاجتماع والمدنيات شو بدكم بالطويل،
تعرفنا على بعض هناك ،عادي يعني ،معرفه عاديه بين زملاءأو أشخاص بشاركوا بمؤتمر،المهم هو حبني وبصراحه قالها الي انه بده يتزوجني،طبعا التقى مع أهلي وطلب أيدي أمي وأبوي وأخوي لكبير طبعا ما وافقوا وعترضوا بشكل كبير،بس أنا عندت كثير وأصريت على راي،جد ما بعرف ليش يعني حب،،كيف بدي أحبه وانا ما بعرفه بشكل كبير تعرفنا على بعضنا عادي يعني بس أنا هيك أصريت حبيت أجرب أحساسا الزواج والسفر لخارج البلاد......
ما بعرف ليش المهم بعد سنه وشوي من الأخذ والرد،،تزوجنا..وطبعا أنا سافرت مع زوجي لمصر،،هو حرام محترم ومنيح ومهذب،،عمله جيد جدا وكامل مما جميعه،،معه مصاري ومش مقصر على البيت شي،،وبصرف منه بخيل وبحب السفر يعني مهنيني ،،بالمختصر مشكلتي هي،،أو ما بعرف اذا أسميها مشكله،،بس أني أنا خايفه هناك بمصر،،مزبوط عرب مثلي مثلهن وطيبين،،بس أنا ما عم برتاح للناس........
خايفه منهن..ما عم بتكيف معهم..شاعره نفسي غريبه،،بينهم ما برتاح لأقربائه مخصوصا أعمامه وأبنائهم الشباب،،،أنا عارفه أني طولت عليكم،،بس ما في حدا أشكي له غيركم،،،،يمكن ندمت ما بعرف بس كمان ما بسترجي أقول هيك شي لأمي وأهلي لأني أنا الي أصريت،،أنا صار لي متزوجه سنه وشهر،
شفت أهلي مره بشرم جد لما شفتهم كثير انبسطت ولما كان يوم الوداع انهم بدهم هم رجعوا لبلادهم وانا ارجع للقاهره ولشقتي وبيتي بالمهندسين...بكيت بحرقه كثير كثير...وكنت بدي اروح عندهم ومعهم،جد بنات بحياتكم ما تعاندوا وتركبوا راسكم عشان بس تتزوجوا لبريت الدوله،،طبعا راح أرجع قولها كمان مره زوجي كثير كثير منيح وانا جد حبيته ومتعلقه فيه لانه هو الوحيد الي بثق فيه بالغربه والي برتاح معاه،
بس جد شو الحل، هو اكيد راح يرفض يرجع معي على حيفا لانه راح يقول لي هذه اسرائيل وهو مش ممكن يسكن هناك وما بعرف شو بالغم انه بقدر عشان معه جنسيه امريكيه،،بس هو رافض يعيش ويستقر بأمريكا وبأسرائيل كمان....يعني هو كان يسافر 2او 3 اشهر سوي شغل بسيط بأمريكا بس مش ممكن يستقر هناك،
شو الحل برأيكم أنا عم خاف من الناس وما عم أمن لها ،،كيف أتعامل معهم وكيف احبهم وأطمن لهم،جد أنا صابني أعياء شديد بمصر لأني ما عم أتأقلم مع الجو ما عم أكل من أكلهم وطبيخهم بس أكل سريع من بيتزا هت كنتاكي همبورغر،،شو الحل عشان أتأقلم،،وشكرا ومتأسفه على الأطاله.
أنصحوني بدون أستهزاء أو مسخره،،وبانيت منشان الله تنشرولي مشكلتي اليوم أمانه أمانه منشان الله،أناعارفه انكم يا أهلي ويا أقربائي راح تعرفوني اني انا الي كاتبه المشكله،،بس هيك أحسن لأني ما بقدر أقولها لكم مباشرة وجه لوجه.......
أرجو النشر بسرعه بانيت منشان الله،،أمانه عليكم تنشروها أول ما تستقبلوها،،منشان الله..سلام وشكرا.. ومتأسفه على هذه الطريقه بانيت لكني سامت وتعبت وشكرا،أعذروني، سلام.



لمزيد من مشاكل وقلوب حائرة اضغط هنا

لمزيد من قلوب حائرة اضغط هنا
هذه الاعلانات قد تهمك
اغلاق