اغلاق

‘ كأني عامل جريمة‘ - المُمرض المصاب بالكورونا من دبورية ينشر نتيجة الفحص : ‘بكفي حكي فاضي ‘

وصلت الى موقع بانيت وصحيفة بانوراما رسالة من الممرض اسلام علي عزايزة من قربة دبورية والذي تم تشخيص اصابته بفيروس كورونا ، وكان مجلس دبورية قد اعلن امس


الممرض اسلام  علي عزايزة - صورة خاصة


اغلاق روضة الزيتون في دبورية في اعقاب احتكاك اطفال من الروضة مع الممرض المصاب ، قبل علمه باصابته ، وفيما يلي نص الرسالة كما كتبها اسلام بلغته حرفيا ( لم يتم تحرير فحوى الرسالة لُغويا - المحرر ):
" سلام للجميع
انا الممرض الي انصبت بالكورونا بنطاق شغلي مش بنطاق اي محل ثاني الي هو بس بشغلي انا بعالج مرضى كورونا او الي بيجي مع عوارض كورونا ومنكونش متاكدين منو يعني احنا اكثر ناس معرضين ننعدي.بنطاق شغلنا بفرض علينا كل اسبوع نعمل فحص عشان عائلاتنا وسلامة الناس. اعملت فحص قبل العيد وكان سلبي وما طلعت اعيد بدون ماكون متاكد انو سلبي.خلال شغلنا ممكن باي لحظه نعالج بني آدم مش مهم شو بكون وضعه الصحي ممكن يطلع ايجابي لكورونا واشي طبيعي المرض لا عيب ولا حرام لانه الانسان مرات بنعدي باي  موقف واكيد محدا بحب ينعدي ويقعد بحجر صحي.يوم السبت قبل ماروح عالبيت لانه عندي بنت صغيرة عمرها 4 اشهر(الله يحميها) ومرتي واهلي بهموني كثير، قبل ماروح عالبيت اعملت الفحص عشان ماعرضش اي انسان للخطر وطلع الفحص سلبي وروحت عالبيت".

"العيب الناس الي حكت حكي مش بمحلو واطلعوا دعايات على عيلتي وعلى اولاد اختي وكأنو عاملين جريمة قتل او شرف هون العيب"
واضافت الرسالة :" الاحد اطلعت انا ومرتي وبنتي لانه النا اكثر من شهرين مش طالعين من البيت وحسب تعليمات وزارة الصحه وكل محل رحنا عليه اتاكدنا انو نقعد بعيد عن الناس اكثر من مترين عشان لا نخاطر بحدا ولا حدا يخاطر فينا وكمان التقيت باهلي ببيتهن واولاد اختي.الاثنين ارجعت عشغلي واشتغلت من الصبح لليل. بالليل وانا نايم فقت حسيت وجهي حامي ومع انو مكنش علي حم بس احسن ماخاطر عالمحل رحت اعملت فحص بقسم الطوارئ بايخيلوف بدون ماقرب عحدا او حدا يقرب علي حسب التعليمات وبعد بساعه طلع الجواب ايجابي.اول اشي اعملتو اتصلت على اهلي كلهن يفوتوا لحجر صحي واختي تجيب اولادها من ال גן عشان منعرضش حدا للخطر ولا اكون انا السبب. روحت وقاعد بغرفه لحالي وكل اهلي توجهوا لفحوصات بعد بساعه وكلهن صحتهن منيحه كثير.الحمدلله انا بشتغل مع مرضى كورونا ومعرض درجه اولى للمرض ومش عيب ومش حرام وماخذ كل الوقايه اللازمه وبعمل كل اسبوع فحوصات.بعد بنص ساعة كل واحد عرفني اتصلي واتصل يتطمن علي بعرفش من وين عرفوا وكيف صار الخبر مذيوع مع انو مش عيب.بس العيب الناس الي حكت حكي مش بمحلو واطلعوا دعايات على عيلتي وعلى اولاد اختي وكأنو عاملين جريمه قتل او شرف هون العيب. المرض مش عيب ومش حرام وانا انعديت من مرضى الي عالجتهن لانقذهن مش اشي ثاني لاسمح الله. الي بحب يحكي معي ومع عيلتي ويتطمن ويقوي معنوياتنا اهلا وسهلا والي بدو يطلع حكي بأذي فيي او بعيلتي عيب عليكوا الكورونا اهون بكثير من امراض ثانيه بكفي جهل ووسخ وحكي فاضي.شكرا كثير لكل انسان حكى معي يتطمن علي انا الحمدلله بخير بدون اي عوارض غير شوية تعب".

" مش كل واحد مسك تليفون صار بعرف يحكي وبطلع دعايات عالناس"
واضافت الرسالة :" بالنسبه لاهلي الحمدلله لحد اسا محدا منهن مصاب بكل الاحوال فاتوا حجر صحي وبعملوا فحوصات كل اسبوع واذا حدا منهن انعدى ما منقول غير الحمدلله اجت هيك مش مرض عاطل الي وقتها الله بعلم وين منكون.لو سمحتوا الاشي صعب علي انا شخصيا بنتي 4 اشهر قاعد بشوفها بس عالفيديو والصور واهلي كذالك خافوا الله في عندكوا كلمه منيحه اهلا وسهلا فش عندكوا كلمه منيحه وحياتكوا تخبصوش وتطلعوش جهلكوا مش كل واحد مسك تليفون صار بعرف يحكي وبطلع دعايات عالناس.كل انسان كنت معاه باحتكاك وصلو تليفون وفات للحجر الصحي وانا يوم الاحد كنت بعد فحص يوم السبت العصر وكان سلبي فما خاطرت بحدا ودايما بتعامل مع الامور بجديه.شكرا للجميع الي حكوا معي واتطمنوا علي من جميع الجهات ان كان من الشغل او من الحياة الشخصية والف سلامة للجميع.مرفق جواب الفحص يوم السبت 30/5/2020 نتيجته سلبي" ، الى هنا نص الرسالة.


نتيجة الفحص السلبية يوم السبت - كما وصلتنا من الممرض اسلام عزايزة

لمزيد من اخبار محلية اضغط هنا
هذه الاعلانات قد تهمك
اخبار محلية
اغلاق